Cagayan – Binigyang katuparan ng First Cagayan Provincial Mobile Force Company ang wishlist ng mga Persons Deprived of Liberty sa araw ng mga puso sa isang programang naganap sa Tuguegarao City District Jail Female Dormitory nitong Martes, ika-14 ng Pebrero 2023.
Ayon kay Police Lieutenant Colonel Vincent Maguddayao, Force Commander ng First CPMFC, ang aktibidad ay bahagi ng kanilang “Project PDLigaya” na naglalayong makapagbigay saya sa ating mga kababayan na nakapiit sa bilangguan.
Dagdag pa niya, layon din nitong makapagbigay ng isang bagong pag-asa at inspirasyon sa mga PDLs na huwag sumuko sa buhay.
Matagumpay na naisakatuparan ang proyekto sa tulong, suporta, at pakikiisa ng iba’t ibang stakeholders, buong hanay ng Cagayano Cops sa ilalim ng pamumuno ni Police Colonel Julio S Gorospe Jr., at Tuguegarao City District Jail.
Makikita sa kinang ng mata at matatamis na ngiti ng mga benepisyaryo ang labis na galak at pasasalamat sa kanilang pagtanggap ng mga regalo mula sa PNP.
Patunay lamang ang aktibidad ng walang kinikilingang serbisyo at malasakit ng Pambansang Pulisya para sa lahat na tunay na pagpapamalas ng PNP Core Value na “Makatao”.
Source: First Cagayan Provincial Mobile Force Company
Panulat ni Police Staff Sergeant Mary Joy D Reyes
