Camarines Norte – Tinatayang nasa Php510,000 halaga ng shabu ang nakumpiska sa dalawang lalaki sa drug buy-bust operation ng Bicol PNP sa Purok 1, Barangay Tawig, Paracale, Camarines Norte nito lamang , Pebrero 12, 2023.
Kinilala ni Police Brigadier General Rudolph Dimas, Regional Director ng Police Regional Office 5, ang naaresto na sina alyas “Geloy”, 36, binata, isang construction worker at residente ng Purok 2, Barangay Parang, Jose Panganiban, Camarines Norte at si alyas “Ritchie”, 42, may kinakasama, walang trabaho at residente ng Purok 5, Barangay Luklukan Sur, Jose Panganiban, Camarines Norte na parehong tinaguriang Newly Identified Drug Personalities ng PNP.
Ayon kay PBGen Dimas, naaresto ang mga suspek matapos silang kumagat sa pain sa operasyon na ikinasa ng pinagsanib na mga tauhan ng Regional Police Drug Enforcement Unit 5, Camarines Norte Provincial Intelligence Unit, 501st Maneuver Company, RMFB5 at Camarines Norte 2nd PMFC at Paracale MPS.
Ayon pa kay PBGen Dimas, nakumpiska sa dalawang suspek ang ilang piraso ng hinihinalang shabu na tumitimbang ng 75 gramo at nagkakahalaga ng Php510,000, Php500 na buy-bust money at 169 na piraso ng Php1,000 na boodle money.
Mahaharap ang mga suspek sa kasong paglabag sa Section 5 at 11, Article II ng RA 9165 o Comprehensive Dangerous Drugs Act of 2002.
Ang Pambansang Pulisya ay patuloy sa pagsagawa ng ganitong mga operasyon upang matuldukan na ang pagkalat ng ilegal na droga sa ating komunidad.
Source: Camarines Norte PPO
