Cebu – Timbog sa inilunsad na buy-bust operation ng Mandaue City Police Office ang isang drug suspek matapos makumpiskahan ng libo-libong halaga ng shabu sa Sitio Pukang, Brgy. Opao, Mandaue City, Cebu noong Sabado, Pebrero 11, 2023.
Kinilala ni Police Colonel Jefrey Caballes, City Director ng Mandaue City Police Office, ang naaresto na si alyas “Joseph”, 34, residente ng Sitio Waling-waling ng nabanggit na barangay.
Ayon kay Police Colonel Caballes, nadakip ang suspek dakong alas-12:15 ng hapon matapos makabili ang poseur buyer ng isang sachet na naglalaman ng hinihinalang shabu mula sa suspek sa operasyon na ikinasa ng Police Station 5, MCPO na pinangunahan ni Police Major James M Conaco, Station Commander.
Nasamsam kay “Joseph” ang tinatayang nasa 15 gramo ng hinihinalang shabu na nagkakahalaga ng nasa Php102,000 at buy-bust money.
Sasampahan ng kasong paglabag sa Republic Act 9165 o ang Comprehensive Dangerous Drugs Act of 2002 ang suspek.
Siniguro naman ng Mandaue PNP na kanila pang paghuhusayin at paiigtingin ang mga hakbangin upang sugpuin ang ilegal na droga sa lungsod para sa pagsusulong ng kaayusan at kapayapaan ng pamayanan.
