Valenzuela City — Timbog ang isang lalaking suspek na sangkot sa carnapping incident sa isinagawang dragnet operation ng Valenzuela City Police Station nito lamang Sabado, Pebrero 11, 2023.
Kinilala ni PBGen Ponce Rogelio Peñones Jr, District Director ng Northern Police District, ang suspek sa pangalang Raymond, 45, at residente ng No. 50 Apolonia St., Mapulang Lupa, Valenzuela City.
Ayon kay PBGen Peñones Jr, ipinarada ng biktima ang kanyang minamanehong sasakyan sa Kabatuhan, Home Centrum, Mapulang Lupa, Valenzuela City bandang 9:50 ng umaga ng nasabing petsa habang umaandar ang makina at sadyang bumaba sa kanyang sasakyan upang bumili ng gulay sa tindahan. Makalipas ang ilang minuto, sumakay ang suspek sa kanyang sasakyan at mabilis na tumakbo patungo sa Barangay Ugong, Valenzuela City. Agad nagsumbong sa Valenzuela CPS ang biktima at agad naman rumesponde ang mga operatiba.
Natunton ng mga kapulisan ang lokasyon ng ninakaw na sasakyan sa pamamagitan ng GPS ng cellphone sa Street No. 30 sa Manila North Cemetery bandang alas-2:20 ng hapon, apat (4) na oras matapos ang insidente na nagresulta sa matagumpay na pagkakaaresto sa suspek.
Narekober sa suspek ang cellphone ng biktima na kulay itim na iPhone 10XS MAX na nagkakahalaga ng Php15,000 kasama ang ignition key ng ninakaw na sasakyan.
Mahaharap ang suspek sa kasong paglabag sa RA 10883 o New Anti-Carnapping Act.
Pinuri ni PBGen Peñones, Jr. ang mga kapulisan ng Valenzuela CPS sa kanilang mabilis na pagtugon, aniya, “Nais kong purihin at batiin ang ating mga pulis para sa kalidad na ipinakita nila sa kanilang trabaho.”
Hinimok din nya ang publiko na huwag mag-alinlangang makipagtulungan at isumbong sa PNP ang lahat ng mga tao na may kinasasangkutang krimen.
Source: NPD PIO
Panulat ni PSSg Remelin M Gargantos
