Davao del Norte – Arestado ang isang indibidwal sa isinagawang buy-bust operation ng PNP sa Purok Margarita, Barangay Mankilam, Tagum City, Davao del Norte, noong Pebrero 7, 2023.
Kinilala ni Police Lieutenant Colonel Jay Dema-Ala, Acting Chief of Police ng Tagum City Police Station, ang suspek na si alyas “Agaw”, 45, residente ng Barangay Madaum, Tagum City, Davao del Norte na tinaguriang Top 7 High Value Individual sa Regional level.
Ayon kay PLtCol Dema-Ala, naaresto ang suspek matapos mahuli sa akto ng pagbebenta ng ilegal na droga sa nagpanggap na poseur buyer na tauhan ng Tagum CPS kasama ang Davao Norte Police Provincial Office -Police Drug Enforcement Unit katuwang ang Regional Mobile Force Battalion 11.
Dagdag pa ni PLtCol Dema-Ala, nakuha mula sa suspek ang ilang pakete ng hinihinalang shabu na may bigat na humigit kumulang na isang gramo na may street market value na Php6,800 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Patuloy sa pagsasagawa ng operasyon kontra sa ilegal na droga ang Police Regional Office 11 upang makamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
