Northern Samar – Nasabat ng pinagsanib na pwersa ng mga operatiba ng PNP, PDEA at PCG ang kilo-kilong shabu sa isinagawang Joint Land Interdiction Operation sa Brgy. Jubasan, Allen, Northern Samar nitong Enero 31, 2023.
Ang operasyon ay tinawag na Task Force Maharlika sa pamumuno ni Police Brigadier General Rommel Francisci Marbil, Regional Director ng PRO8 kasama ang mga operatiba ng Regional Highway Patrol Unit 8, Regional Intelligence Division, Regional Drugs Enforcement Unit, Northern Samar PPO, Allen MPS, Northern Samar PMFC, Northern Samar Provincial Intelligence unit, Coast Guard Station Northern Samar at PDEA RO8.
Ang operasyon ay nagresulta sa pagkakaaresto sa subject person na si Mangayao Lapan Mitomara, 40 at residente ng Sudoc, Marawi City, Lanao del Sur.
Ayon kay PBGen Marbil, napag-alaman na pabalik na sana ng Mindanao ang suspek gamit ang isang Toyota Vios na sasakyan pero nang makalabas ito ng Allen Port bandang alas 2:45 ng hapon, naharang ito ng HPG dahil sa hindi nakasuot ng seatbelt ang driver at hindi nakarehistro ang sasakyan. Dahil dito, nag-request ang HPG ng K9 dahilan para pumunta sa lugar ang PDEA.
Matapos suriin ang sasakyan, nadiskubre sa likuran ang dala nitong kilo-kilong pinaghihinalaang shabu na nakasilid sa isang ecobag na tinatayang aabot sa Php69 milyon ang halaga ng nakumpiskang ilegal na droga.
Sa ngayon, nahaharap si Mitomara sa kasong paglabag sa Republic Act No. 9165 o ang Comprehensive Dangerous Drugs Act of 2002.
Ang PNP at iba pang Law Enforcement Agency ay patuloy sa pagsasagawa ng anti-illegal drugs operation upang mapanatili ang kaayusan at katahimikan ng bayan.
