Quezon – Tinatayang Php2,040,000 halaga ng shabu ang nasabat sa dalawang suspek kabilang ang isang High Value Individual (HVI) sa buy-bust operation ng Provincial Drug Enforcement Unit-Quezon, General Luna Municipal Police Station at PDEA sa Sitio Malalim, Brgy. San Jose, Gen Luna, Quezon bandang 1:05 ng madaling araw nito lamang Linggo, Enero 29, 2023.
Kinilala ni Police Colonel Ledon Monte, Provincial Director ng Quezon Police Provincial Office, ang dalawang suspek na sina alyas “Mami”, 41 at alyas “Marie”, 45, pawang mga residente ng naturang barangay.
Nakumpiska sa dalawang suspek ang 20 heat-sealed plastic sachets na naglalaman ng hinihinalang shabu na tumitimbang ng 100 gramo na may tinatayang halaga na Php2,040,000, isang green shoulder bag at 14 na piraso ng Php1,000 bill na ginamit bilang buy-bust money.
Ang dalawang suspek ay nahaharap sa kasong paglabag sa Sec 5 at 11 ng Art II ng RA 9165 o Comprehensive Dangerous Drugs Act of 2002.
Ang tagumpay ng Quezon PNP sa pagsugpo ng ilegal na droga at ibang pang may pagkakasala sa batas ay bunga ng pinaigting na suporta at pakikipagugnayan ng mamamayan upang mapanatili na ligtas at maayos ang komunidad.
Panulat ni PEMS Joe Peter Cabugon/ RPCADU4A
