Camarines Norte – Boluntaryong sumuko ang isang miyembro ng Communist Terrorist Group sa Camarines Norte PNP at AFP sa Purok 1, Barangay North Poblacion, Jose Panganiban, Camarines Norte nito lamang Martes, Enero 24, 2023.
Kinilala ni Police Major Ace J Flores, Hepe ng Jose Panganiban Municipal Police Station, ang sumuko na si “Ka Roy”, 63, may asawa at dating kasapi ng Larangan 1, Kilusang Partido 1, Armando Katapia Command.
Ayon kay PMaj Flores, naging matagumpay ang nasabing pagsuko dahil sa pagsisikap ng Jose Panganiban MPS, Regional Intelligence Unit (RIU), Camarines Norte Police Provincial Office Provincial Intelligence Unit (CNPPO PIU), Camarines Norte 1st at 2nd PMFC, Provincial Tracker Team at Armed Forces of the Philippines (AFP).
Ayon pa kay PMaj Flores, boluntaryong sumuko si “Ka Roy” sa pamamagitan ng programa ng pamahalaan na NTF-ELCAC (National Task Force to End Local Communist Armed Conflict) at E-CLIP (Enhanced Comprehensive Local Integration Program) kung saan ang pamahalaan ay naglalayong tulungan ang ating mga kapatid na kasapi ng CPP-NPA-NDF at Militia ng Bayan.
Sa pamamagitan nito, sila ay mabibigyan ng mga iba’t ibang tulong, kaalaman at kasanayan na kanilang magagamit sa pagbabagong buhay.
Isinuko ni “Ka Roy” ang isang kalibre 38 revolver na baril na kargado ng limang bala.
Ito naman ang pahayag ni PCol Antonio C Bilon Jr, Provincial Director ng Camarines Norte PPO, “Sa mga taong nais magbalik-loob sa ating pamahalaan ay huwag mag-alinlangan na sumuko, sapagkat buong puso silang tatanggapin at handang tulungan ng ating pamahalaan, hindi lamang sila kundi pati na rin ang kanilang pamilya upang makapagbagong buhay at makamit ang ganap na kapayapaan dito sa ating bansa.”
Source: Camarines Norte PPO
