Cebu City – Kulong ang isang E-bike driver sa Cebu City matapos makuhanan ng nasa mahigit Php7 milyong halaga ng shabu sa inilunsad na buy-bust operation ng mga operatiba ng Police Station (PS) 6, Cebu City Police Office (CCPO) sa Sitio Mahayahay II, Brgy. Pasil, Cebu City nito lamang Lunes, Enero 23, 2023.
Kinilala ni Police Major Francis Renz Liquigan Talosig, Station Commander, ang naarestong suspek na si Alyas “JV”, 21, residente ng Brgy. Suba, Cebu City, at kabilang sa talaan ng High Value Individual (Regional Level).
Ayon kay PMaj Talosig, nadakip ang suspek dakong alas 8:55 ng gabi matapos makuha mula rito ang nasa mahigit isang kilo ng hinihinalang shabu na may Standard Drug Price (SDP) na Php7,174,000.
Mahaharap ang suspek sa kasong paglabag sa Sec. 5 at 11, Art. II ng RA 9165 (Comprehensive Dangerous Drugs Act of 2002).
Bunga ng matagumpay na operasyon, pinuri at muling hinikayat ni PCol Ireneo Dalogdog, City Director ng CCPO, ang buong hanay ng PS 6 na ipagpatuloy at lalong pagbutihin ang maayos at mahusay na pagsasakatuparan ng kampanya kontra ilegal na droga maging sa lahat ng uri ng kriminalidad para sa kaayusan, kaligtasan, at kapayapaan ng komunidad.
