Sa pangunguna ng kapulisan at pakikipagtulungan ng Advocacy Support Groups at ng mga volunteers sa Bohol, tagumpay na itinanim ang tinatayang nasa mahigit 1000 puno sa inilunsad na Tree Planting Activity sa Barangay San Roque,Talibon, Bohol noong Biyernes, Enero 20, 2023.
Kabilang sa mga nakiisa sa aktibidad ay ang iba’t ibang istasyon ng naturang probinsya kabilang na rito ang Trinidad Municipal Police Station (MPS), Ubay MPS, Bien Unido MPS, Talibon MPS, Buenavista MPS, Pres Garcia MPS, Inabanga MPS, Clarin at Sagbayan MPS, San Miguel MPS, at Getafe MPS, maging ang mga miyembro ng Faith-Based Group, Kabataan Kontra Droga at Terorismo (KKDAT), mga pamunuan at residente ng nasabing barangay.
Ayon sa Chief, Provincial Community Affairs and Development Unit (PCADU) ng Bohol Police Provincial Office (BPPO) na si Police Lieutenant Colonel Joseph Puyod Berondo, ang matagumpay na pagsasakatuparan ng aktibidad ay bahagi ng isa sa mga isinusulong na programa at best practices ng Bohol PNP at maging ng buong rehiyon, ang “Project HAW-AS”.
Pangunahing layunin ng naturang programa ang patuloy na pagsusulong at pagbibigay kamalayan sa publiko upang pangalagaan at bigyang kalinga ang kalikasan. Kasunod nito ay hikayatin ang bawat isa upang maging bahagi sa matagumpay na pagsasakatuparan ng programa para sa kaayusan at kaligtasan ng bawat mamamayan.
