Samar – Agarang nirespondehan ng mga tauhan ng Calbayog City Police Station ang nangyaring pamamaril sa isang magsasaka sa Purok 2, Brgy. Tabawan, Calbayog City nitong Biyernes, Enero 20, 2023.
Kinilala ni Police Lieutenant Colonel Ericson Del Rosario, Chief-of-Police, ang biktima na si Romnick Garalza y Degnos, 34, may asawa, isang magsasaka, at residente ng nasabing lugar.
Ayon kay PLtCol Del Rosario, sa salaysay ng nakababatang kapatid ng biktima, bandang alas 5:40 ng umaga, habang ang biktima ay nagtatrabaho sa bukirin kung saan nagbubungkal ang biktima nang makarinig sila ng putok ng baril mula sa nasabing lugar kaya agad na pinuntahan ito at doon na tumambad ang nakahandusay na katawan ng biktima bunsod ng tama ng bala sa ulo gamit ang hindi pa matukoy na uri ng baril.
Agad namang tumakas ang suspek patungo sa hindi pa malamang direksyon.
Nagsagawa naman ng hot pursuit operation ang mga tauhan ng Calbayog CPS para sa pagtukoy ng posibleng pagkakakilanlan at agad na pag-aresto sa tumakas na suspek.
Nangako naman ang kapulisan sa pamilya ng biktima na gagawin ang lahat para mahuli ang salarin at mabigyan ng hustisya ang naging biktima nito.
