Taguig City — Tuluyan nang sumuko ang 21 dating miyembro ng Communist Terrorist Group (CTG) sa tanggapan ng Regional Mobile Force Battalion Headquarters, Camp Bagong Diwa, Bicutan, Taguig City nito lamang Huwebes, Enero 19, 2023.
Ang aktibidad ay pinangunahan ng mga tauhan ng F2-RMFB sa pangunguna ni Police Major Vinboy Pacamarra sa ilalim ng pangangasiwa ni Police Colonel Jonathan Calixto, Acting Force Commander ng RMFB-NCRPO kasama ang ibang tauhan ng RID, NCRPO; RCADD, NCRPO; DID, SPD; DID, QCPD; RID, PRO 3; JTF, NCR; NISG, NCR; 11th CMO PA; at NICA – NCR.
Ang pagsuko ng dating mga rebelde ay resulta ng patuloy na pagsisikap at mahusay na diyalogo/negosasyon ng pulisya para kumbinsihin silang sumuko sa gobyerno at talikuran ang kanilang pakikipaglaban sa gobyerno.
Ayon pa kay PCol Calixto, karamihan sa kanila ay na-recruit ni alyas “Wilma” at lumahok sa mga kilusang masa sa NCR at sa ilang bahagi ng Bulacan.
Karamihan sa mga personalidad ay tinatarget din na sanayin at maging bahagi ng armadong pakikibaka sa NCR, Region 3 at 4A. Bukod dito, ang isa sa kanila ay nagsilbi bilang opisyal ng Kadamay sa Mapulang Lupa, Bulacan mula 2017 hanggang 2019. Siya ang namamahala sa mga usapin sa pananalapi tulad ng buwanang bayad sa mga nakolekta mula sa mga regular na miyembro ng KADAMAY at namamahala rin sa mga pondong ginagamit sa transportasyon sa tuwing may “rally.”
Kaya naman ang mga sumukong rebelde ay nanumpa ng kanilang katapatan upang wakasan ang problema sa insurhensiya. Sila rin ay nakatanggap ng mga food packs mula sa kapulisan na makatutulong sa kanilang pamumuhay.
Mainit ding tinanggap ni PCol Calixto, ang pagsuko ng mga nasabing miyembro ng NPA, at nagpahayag ng kanyang pasasalamat nang sa wakas ay nagpasya silang bumalik sa kanilang mga pamilya at tamasain ang isang magandang kinabukasan.
Tiniyak din niya ang kaligtasan ng mga surrenderees at hinimok ang mga natitirang miyembro ng NPA na sumuko at gamitin ang tulong na iniaalok ng gobyerno sa pamamagitan ng integration program upang matulungan silang bumuo ng bago at normal na buhay kasama ang kanilang mga mahal sa buhay.
Source: RMFB PIO
Panulat ni PSSg Remelin M Gargantos
