Taguig City — Opisyal na inilunsad ng National Capital Regional Police Office ang S.A.F.E. NCRPO App Alert na tinawag ding “Crime Reporting by the Tip of a Finger” nito lamang ika-16 ng Enero 2023 sa Camp Bagong Diwa, Bicutan, Taguig City.
Ang programa ay pinangunahan ni NCRPO Chief, PMGen Jonnel C Estomo, na dinaluhan ni DILG Sec. Atty. Benjamin “Benhur” Abalos Jr. bilang panauhing pandangal kasama ang iba pang opisyales ng NCRPO, at mga Mayor ng lungsod ng Muntinlupa, Taguig, Pasay, at munisipalidad ng Pateros.
Ang S.A.F.E. NCRPO App Alert mobile application ay isang server na babantayan 24/7 ng mga nasa Tactical Operation Centers (TOCs) ng NCRPO na mabilis na naipapadala ang alarma at mensahe sa pinakamalapit na pulis na nagpapatrolya sa naiulat na mga insidente upang agad na marespondehan.
Ang nasabing App ay hindi lang umaasa sa koneksyon sa internet, kung halimbawang wala ito, ipapadala ang alerto sa pamamagitan ng Short Messaging System (SMS).
Bukod pa rito, ito ay pwede rin sa Unlimited Text load ng anumang Telecommunications company.
Ani Sec. Abalos, “Napakaganda ng liderato ng Philippine National Police at inaasahan natin na with the launching of this S.A.F.E. NCRPO App Alert talagang lalo tayong kikilos maigi.”
Dagdag pa, ang proyektong ito ay magbibigay ng dedikadong police alert hotline para sa lahat ng mga taga-Metro Manila.
Ayon naman kay PMGen Estomo, ang S.A.F.E. App Alert ay naglalayong mapanatili ang layunin ng S.A.F.E. NCRPO program kung saan ang mga pulisya ay nakikita, pinapahalagahan, at nararamdaman sa kanilang pambihirang serbisyo.
Source: PIO NCRPO
Panulat ni PSSg Remelin M Gargantos
