Davao Oriental – Tinatayang aabot sa Php408,000 halaga ng hinihinalang shabu ang nasabat sa isinagawang buy-bust operation ng Mati PNP sa Brgy. Dahican, Mati City, Davao Oriental, noong Enero 13, 2022.
Kinilala ni PLtCol Ernesto Gregore, Acting Chief of Police ng Mati City Police Station, ang suspek na si alyas “Junrex”, 39, residente ng Purok 4-B, Brgy. Mayo, Mati City, Davao Oriental na tinaguriang Top 5 High Value Individual sa Regional level.
Ayon kay PLtCol Gregore, naaresto ang suspek sa isinagawang buy-bust operation ng pinagsamang tauhan ng Mati CPS kasama ang Provincial Drug Enforcement Unit Davao Oriental Police Provincial Office katuwang ang PDEA Davao Oriental.
Dagdag pa ni PLtCol Gregore, nakuha mula sa suspek ang ilang pakete ng hinihinalang shabu na may bigat na humigit kumulang 60 gramo na may street market value na Php408,000 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Pinuri naman ni PBGen Benjamin Silo Jr., PRO11 Regional Director ang nasabing operasyon dahil sa matagumpay na pagkakadakip sa suspek ay maglalapit sa layunin ng Police Regional Office 11 na gawing drug-free ang rehiyon onse.
Panulat ni Patrolman Alfred Vergara
