Laguna – Tinatayang Php4,616,860 na halaga ng shabu ang nasabat sa tatlong suspek kabilang ang isang High Value Individual sa magkahiwalay na operasyon ng CALABARZON PNP at PDEA sa Quezon at Cavite nito lamang Linggo, Enero 8, 2023.
Kinilala ni Police Brigadier General Jose Melencio Nartatez Jr., Regional Director ng Police Regional Office 4A, ang mga suspek na sina alias “Dos” 39, alyas “Lovely”, 22 at alyas “Aljon”, 31, pawang mga residente ng Lancaster City, Brgy. Navarro, Gen Trias City, Cavite.
Ayon kay PBGen Nartatez Jr., bandang 11:37 ng gabi naaresto si alyas “Dos” sa Purok 7, Brgy. Dalahican, Lucena City sa isinagawang buy-bust operation ng pinagsanib na puwersa ng Quezon Provincial Drug Enforcement Unit, Philippine Drug Enforcement Agency 4A at Lucena City Special Drug Enforcement Unit.
Samantalang, ang suspek na sina alyas “Lovely” at “Aljon” ay naaresto sa Gen. Trias, Cavite sa operasyon ng pinagsanib na puwersa ng Kawit Municipal Police Station at Gen Trias City Police Station.
Narekober sa mga suspek ang 47 pirasong heat-sealed transparent plastic sachets ng hinihinalang shabu na tumitimbang ng 498.95 gramo na nagkakahalaga ng Php4,616,860, isang STI Tactical Caliber 45, pitong magazine ng caliber 45, apat na bala, isang Yamaha motorcycle, pitong mobile phone, isang itim na pouch, isang shoulder bag, mga drug paraphernalia, 12 pirasong ng Php1,000 bill na ginamit bilang buy-bust money.
Nahaharap ang mga suspek sa paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Law on Firearms and Ammunition.
Ang tagumpay ng CALABARZON PNP laban sa ilegal na droga at iba pang krimen ay bunga ng pinaigting na suporta at pakikipagtulungan ng mamamayan upang mapanatili na ligtas at maayos ang komunidad.
Panulat ni PEMS Joe Peter Cabugon/RPCADU 4A
