Zambales – Tinatayang Php1,544,960 halaga ng shabu ang nakumpiska sa dalawang suspek sa isinagawang buy-bust operation ng Zambales PNP sa Brgy. Calapacuan, Subic, Zambales nito lamang Sabado, ika-7 ng Enero 2023.
Kinilala ni Police Colonel Fritz Macariola, Provincial Director ng Zambales Police Provincial Office, ang dalawang suspek na sina alyas “John”, 35, High Value Individual, miyembro ng Naldi Drug Group at alyas “Angelica”, 34, residente ng Sitio Bukid, Brgy. Calapacuan, Subic, Zambales.
Ayon kay PCol Macariola, naaresto ang dalawang suspek bandang 3:00 ng madaling araw ng pinagsanib pwersa ng Subic Municipal Police Station, Provincial Intelligence Unit, Provincial Drug Enforcement Unit, 1st at 2nd Provincial Mobile Force Company ng Zambales Police Office.
Nakumpiska sa dalawang suspek ang hinihinalang shabu na tumitimbang ng 227.2 na gramo na nagkakahalaga ng Php1,544,960; dalawang pirasong Php1,000 bill bilang drug money at tatlong pirasong Php1,000 bilang buy-bust money.
Nahaharap ang dalawang suspek sa kasong paglabag sa RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Ang Zambales PNP ay mahigpit sa pangangampanya laban sa ilegal na droga at hinihikayat ang mga mamamayan na sumunod sa ipinatutupad na batas.
Source: Police Regional Office 3
Panulat ni Police Corporal Jeselle Rivera/RPCADU 3
