Quezon – Tinatayang Php3,125,280 na halaga ng shabu ang nasabat sa isang High Value Individual (HVI) at dalawang lalaki sa buy-bust operation ng Police Regional Office 4A nito lamang Miyerkules, Enero 4, 2023.
Kinilala ni Police Lieutenant Colonel Erickson Roranes, Officer-In-Charge ng Lucena City Police Station, ang mga suspek na sina alyas Lorebeth, 47, HVI, residente ng Lucena City at ang kasintahan na si alyas Edward, 50 at ang isa nilang parokyano na si alyas Andrew, 29, residente ng Real, Quezon.
Ayon kay PLtCol Roranes, naaresto ang tatlong suspek dakong alas 10:00 ng umaga sa tahanan ni alyas Lorebeth sa Brgy. Ibabang Dupay, Lucena City ng Drug Enforcement Unit/Intel ng Lucena City Police Station, PDEA4A Quezon, PIU/QPDEU, Quezon Maritime Police Station at CIDG Quezon.
Narekober sa suspek ang 36 pirasong heat-sealed transparent plastic sachets ng hinihinalang shabu na may timbang na 153 gramo na nagkakahalaga ng Php3,125,280, mga pitaka at drug bust money.
Nahaharap ang tatlong suspek sa kasong paglabag sa Section 5 at 11 Article 2 ng Republic Act 9165 o Comprehensive Dangerous Drugs Act of 2002.
Patuloy na paigtingin ng PNP sa tulong ng PDEA at mga mamamayan ang kampanya kontra ilegal na droga para mapanagot ang mga nagtutulak at gumagamit nito at mapanatili ang ligtas, maayos at mapayapang komunidad.
Source: Lucena City Police Station
Panulat ni Police Staff Sergeant Donabel Dulin
