Navotas City — Nasawata ng Northern Police District (NPD) ang iba’t ibang pekeng produkto ng MAKITA sa isang indibidwal sa bisa ng Search Warrant nito lamang Lunes, Disyembre 19, 2022.
Kinilala ni NPD District Director PBGen Ponce Rogelio Peñones Jr., ang suspek na may iba’t ibang alyas, “Ben Ong,” “Ben Ang,” at “Haitao Hong” na nagmamay-ari o manager ng Credibility Logistics Co., Ltd,” ang mismong pagawaan.
Ayon kay PBGen Peñones Jr, bandang alas-9:00 ng umaga nang ipatupad ni Police Colonel Erosito Miranda, Chief ng District Special Operations Unit (DSOU) ang Search Warrant sa loob ng naturang kumpanya na matatagpuan sa kahabaan ng Simeon De Jesus St., San Rafael Village, Navotas City.
Sa nakalap na imbestigasyon, Setyembre 28 ngayong taon nang makatanggap ang DSOU ng impormasyon tungkol sa pamemeke ng mga produkto ng MAKITA na minamaniobra ng suspek.
Sa ginawang Search Warrant ng pulisya, narekober sa pasilidad ang 700 piraso ng Impact Drill, 300 piraso ng Welding Machine, at 24 na piraso ng Impact Hammer Drill na may tinatayang Php5,537,000 kabuuang halaga.
Samantala, natuklasan din ang iba pang pinaniniwalaang pekeng produkto na may market value na humigit kumulang Php200,000,000.
Paglabag sa Section 168 (Unfair Competition) ng RA No. 8293 Intellectual Property Code of the Philippines, Counterfeit (labels, prints, misbranded) ang kinakaharap ngayon ng suspek.
Napag-alaman din na ang Business Permit at Licensing Office ng Navotas at Securities and Exchange Commission ng Credibility Co., Ltd ay hindi nakarehistro sa kanilang mga opisina.
Bantay sarado naman ang pulisya at iba pang ahensya ng gobyerno sa mga posible pang nagkalat na ganitong kalakaran sa bansa.
Source: NPD PIO
Panulat ni PSSg Remelin M Gargantos
