Taguig City — Arestado ang dalawang Foreign Nationals sa isinagawang manhunt operation ng Taguig City Police Station nito lamang Biyernes, Disyembre 16, 2022.
Kinilala ni PBGen Kirby John B Kraft, District Director ng SPD, ang mga suspek na sina alyas Marcel Tezock, 38, at alyas Patian Leroucan, 40, pawang mga Cameroonian National.
Ayon kay PBGen Kraft, bandang 6:30 ng umaga nang maaresto ang dalawa sa Bay Bliss Hideaway Resort, Taguig City ng mga tauhan ng Intelligence Operatives ng Taguig CPS kasama ang ISAFP at JTF-NCR.
Nakumpiska mula sa mga suspek ang isang itim na travelling bag, 15 bundle ng pekeng US Dollars, 4 na bundle ng pekeng Php1,000, caliber 38 Smith and Wesson revolver, hand grenade, at isang 40 mm cartridge.
Samantala, sa isinagawang follow-up operation ng operating unit sa Intelligence Section ng Makati City Police Station ay narekober sa tinitirhan ng mga suspek ang iba pang pekeng pera.
Mga reklamo para sa paglabag sa Art. 168 ng RPC, RA 10591 o Comprehensive Firearms and Ammunition Regulation Act at RA 9516 o Unlawful Manufacture, Sales, Acquisition, Disposition, Importation or Possession of an Explosive or Incendiary Device ang inihahanda laban sa mga naarestong suspek.
Tiniyak ng kapulisan ng Southern Metro na pananagutin sa batas ang mga banyaga na mahuhuli sa ating bansa na gumagawa ng mga ilegal na gawain.
Source: SPD PIO
Panulat ni PSSg Remelin M Gargantos
