Cotabato — Tinatayang Php476,000 halaga ng shabu ang nasabat sa limang suspek sa isinagawang joint buy-bust operation ng Cotabato PNP at PDEA 12 sa Pigcawayan, North Cotabato nito lamang Sabado, Disyembre 10, 2022.
Kinilala ni PBGen Jimili Macaraeg, Regional Director ng Police Regional Office 12, ang mga suspek na sina alyas “Dats”, 23; alyas “Amer”, 42; alyas “Faisal”, 35; alyas “Mohadjerin”, 35; at alyas “Carl Razul”, 24, pawang residente ng Datu Saudi, Maguindanao.
Bandang 9:45 ng umaga nang maaresto ang limang drug suspek ng pinagsanib pwersa ng PDEA North Cotabato Provincial Office, Pigcawayan Municipal Police Station, Libungan Municipal Police Station at iba pang mga operatiba ng PRO 12.
Narekober ng mga operatiba mula sa mga suspek ang dalawang plastic sachet na naglalaman ng hinihinalang shabu na may kabuuang timbang na 70 gramo at may Standard Drug Price na Php476,000; boodle money na Php168,000 at sa ibabaw nito ay ang isang Php1,000 na buy-bust money na may serial number T535986; isang pirasong digital weighing scale, isang unit ng Nissan color gray na minivan na may plate number KAO 8333; isang pirasong orange eco bag; isang itim na sling bag at isang pirasong cellophane.
Katuwang din ng ating kapulisan at PDEA ang ilang media representative at elected Brgy Officials sa naturang operasyon.
Reklamong paglabag sa batas na RA 9165 o Comprehensive Dangerous Drugs Act of 2002 ang kakaharapin ng mga naarestong suspek.
Tinitiyak naman ni PBGen Macaraeg, na mas lalo pang paiigtingin ang kampanya kontra ilegal na droga tungo sa kaayusan, kapayapaan at kaunlaran ng Rehiyong 12.
Panulat ni Patrolman Khnerwin Jay A Medelin
