Taguig City — Tinatayang Php9,180,000 halaga ng shabu ang nasabat sa hepe ng PDEA South District Office at sa dalawa pang agent nito kasama ang isang sibilyang driver sa isinagawang buy-bust operation ng mga otoridad nito lamang Martes, Disyembre 6, 2022.
Kinilala ni PBGen Jonnel Estomo, Acting Regional Director ng NCRPO, ang mga suspek na sina alyas “Enrique”, ang nasabing hepe; sina alyas “Anthony Vic” at alyas “Jaireh Llaguno” na pawang mga PDEA SDO Agent; at alyas “Mark Warren”, driver.
Ayon kay PBGen Estomo, bandang 9:00 ng gabi nang maaresto ang mga suspek sa PDEA South District Office na matatagpuan sa A. Bonifacio St. Brgy., Upper Bicutan, Taguig City sa pinagsanib pwersa ng Regional Drug Enforcement Unit – NCRPO, Regional Intelligence Division-NCRPO, Philippine Drug Enforcement Group Special Operations Unit-NCR, Southern Police District Drug Enforcement Unit, District intelligence Division-SPD, District Mobile Force Battalion-SDD, Taguig City Police Station DEU, 35 SAC NCRPO at PDEA-NCR.
Nakumpiska mula sa kanila ang tatlong small knot-tied transparent sachet na hinihinalang shabu na humigitkumulang 100 gramo at nagkakahalaga ng Php680,000; isa pang malaking self-sealing plastic na may bigat na 1,250 gramo at may DDB value na Php8,500,000; isang tunay na Php1,000; 99 piraso na Php1,000 boodle money; apat na baril; at isang digital weighing scale.
Mahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Sa inilabas na mensahe ni PBGen Estomo na kanyang ipinarating sa publiko, “Team NCRPO will continue to combat illegal drugs in the region. Patuloy tayo sa pagpapatupad ng batas nang walang pinagtatakpan at kinikilingan.”
Ito din ay alinsunod sa kampanya ng Department of Interior and Local Government (DILG) na binansagang “BIDA” o Buhay Ingatan, Droga’y Ayawan na tinaguriang whole of nation approach.
Source: PIO NCRPO
Panulat ni PSSg Remelin M Gargantos
