Davao City – Tinatayang aabot sa Php762,820 halaga ng hinihinalang shabu ang nasabat sa isinagawang buy-bust operation ng PNP sa Mc Arthur Highway Dumoy Proper, Davao City, noong Disyembre 5, 2022.
Kinilala ni Police Major Nelson Violan Jr., Acting Station Commander ng Baliok Police Station, ang suspek na si alyas “Kipaw”, 26, residente ng Purok 14, Saavedra Bago Aplaya, Davao City na tinaguriang Top 6 High Value Individual sa City level.
Ayon kay PMaj Violan, naaresto ang suspek sa isinagawang buy-bust operation ng Station Drug Enforcement Unit ng Baliok PS.
Dagdag pa ni PMaj Violan, nakuha mula sa suspek ang ilang pakete ng hinihinalang shabu na may bigat na humigit kumulang 54.49 gramo na may street market value na Php726,820 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkakadakip sa suspek ay malaking tulong upang makamit ng Police Regional Office 11 ang kanilang layunin tungo sa kaayusan at kapayapaan sa lungsod.
Panulat ni Patrolman Alfred Vergara
