General Santos City – Tinatayang Php170,000 na halaga ng shabu ang nasabat ng General Santos City PNP sa isinagawang buy-bust operation sa isang negosyante sa National Highway, Barangay Apopong, General Santos City nito lamang ika-6 ng Disyembre 2022.
Kinilala ni Police Brigadier General Jimili Macaraeg, Regional Director ng Police Regional Office 12, ang drug suspek na si alyas Mastura, 41, may asawa, negosyante at residente ng North Upi, Maguindanao.
Ayon kay PBGen Macaraeg, naaresto ang suspek sa isinagawang buy-bust operation ng mga operatiba ng PRO 12, General Santos City Police Office katuwang ang Philippine Drug Enforcement Agency (PDEA) 12.
Dagdag pa ni PBGen Macaraeg, nakuha mula sa suspek ang ilang pakete ng hinihinalang shabu na may bigat na humigit kumulang 25 gramo na may Standard Drug Price na Php170,000 at marked money na ginamit sa operasyon.
Ang suspek ay nahaharap sa kasong paglabag sa Section 5, Article II ng Republic Act 9165 o “Comprehensive Dangerous Drugs Act of 2002”.
Tinitiyak naman ni PBGen Macaraeg na hindi titigil ang PRO 12 sa kanilang pagsusumikap na sugpuin ang ilegal na droga para tuluyang hindi na ito makasira at makapinsala ng magandang kinabukasan ng kabataan.
Source: Police Regional Office 12 – Public Information Office
Panulat ni Patrolman Khnerwin Jay A Medelin
