Vinzons, Camarines Norte – Tinatayang nasa Php408,000 halaga ng ilegal na droga ang nasabat sa dalawang babae na kabilang sa listahan ng High Value Individual sa ikinasang buy-bust operation ng Camarines Norte PNP sa Barangay Calangcawan Sur, Vinzons, Camarines Norte nito lamang Disyembre 3, 2022.
Kinilala ni Police Major Arkhemedes Garcia, Chief of Police ng Vinzons Municipal Police Station, ang mga suspek na sina alyas “Len-len”, 33 at si alyas “Rona”, 31, parehong walang trabaho na pawang mga residente ng nabanggit na lugar.
Ayon kay PMaj Garcia, bandang 7:40 ng gabi naaresto ang mga suspek ng pinagsanib na mga operatiba ng Regional Police Drug Enforcement Unit 5, Camarines Norte Provincial Intelligence Unit, 501st RMFB5 at Vinzons MPS.
Habang isinasagawa ang body search, nakuha sa pagmamay-ari ni “Rona” ang dalawa pang medium size at isang small size na plastik na naglalaman ng hinihinala rin na shabu.
Samantala, nakuha naman kay alyas “Len-Len” ang Php500 marked money kasama ang 339 piraso ng Php1,000 boodle money at isang Php500 na ginamit bilang buy-bust money.
Tinatayang umaabot sa 60 gramo ng ilegal na droga ang nakumpiska na may katumbas na street value na umaabot sa Php408,000.
Mahaharap ang mga suspek sa kasong paglabag sa RA 9165 o “Comprehensive Dangerous Drugs Act of 2002.
Ito ang naging pahayag ni PCol Antonio Bilon Jr., Provincial Director ng Camarines Norte PPO, “Nagpapasalamat po tayo sa kooperasyon ng bawat isa na nagresulta sa pagkakaaresto ng dalawang babaeng nakatala bilang HVI drug personalities. Malaking bagay na tayo po ay nagkakaisa at nagtutulungan sa ating laban kontra ilegal na droga. Ang inyong kapulisan ay mananatili sa paglikha at pagsasagawa ng iba’t ibang mga aktibidad katulad ng mga drug demand reduction activities na walang puknat na isinasagawa at inilalatag ng inyong kapulisan sa labindalawang bayan ng probinsya ng Camarines Norte”.
Source: Camarines Norte Police Provincial Office – Pulis Bantayog
