Malabon City — Timbog ang dalawang lalaki ng mga operatiba ng Malabon City Police Station dahil sa pagdadala ng baril at granada na walang kaukulang papeles at patalim nito lamang Sabado, Disyembre 3, 2022.
Kinilala ni Police Colonel Ponce Rogelio Peñones Jr., Acting District Director ng Northern Police District (NPD), ang mga suspek na sina alyas Rommel, 26, residente ng No. 29 Adante St., Barangay Tañong, Malabon City; at alyas Allan Deriada, 40, residente naman ng Chungkang St. Tanza, Navotas City.
Ayon kay PCol Peñones Jr, bandang 1:50 ng madaling araw nang maaresto ang mga suspek sa kahabaan ng C4 Road, Barangay Tañong, Malabon City ng mga operatiba ng Station Intelligence Section ng Malabon CPS.
Ayon pa kay PCol Peñones Jr, nakataggap sila ng sumbong mula sa isa sa mga Barangay Information Network (BIN) hinggil sa presensya ng pinuno ng Salibio Group na namataan sa nasabing lugar kaya agad umaksyon ang mga kapulisan kung saan ang dalawang lalaki ay namataang nakaupo sa tabi at may hawak na baril na nakasukbit sa kanilang baywang.
Nakumpiska kay alyas Rommel ang isang caliber 22 revolver na may serial number na 750616 na gawa sa Germany na may kargang limang live ammunitions at isang hand grenade habang narekober naman kay alyas Allan ang isang improvised bladed na armas na may sukat na humigit kumulang 9 na pulgada ang haba.
Mahaharap si alyas “Rommel” sa mga kasong paglabag sa RA 10591 (Comprehensive Law on Firearms and Ammunitions) at paglabag sa RA 9516 (Unlawful Possession of Explosives), habang si alyas Allan naman ay paglabag sa BP 6.
Sinisigurado ni PCol Peñones Jr. na pananagutin sa batas ang mga indibidwal na lumalabag sa batas kasabay ng kanyang pagpapasalamat sa ating mga kababayan na tumutulong upang sila ay madakip.
Source: NPD PIO
Panulat ni PSSg Remelin M Gargantos
