Mandaue City, Cebu – Arestado ang magkasintahan sa Mandaue City matapos makuhanan ng tinatayang nasa mahigit Php2.1 milyong halaga ng shabu sa inilunsad na buy-bust operation ng mga operatiba ng Police Station 3, Mandaue City Police Office (MCPO) nito lamang ika-29 ng Nobyembre 2022.
Kinilala ni Police Captain Emmanuel Rabaya, Station Chief, ang mga naaresto na sina alyas “James”, 31, at ang kasintahan nitong si alyas “Riza”, 27, na kapwa residente ng Brgy. Lagtang, Talisay City, Cebu.
Ayon kay Police Captain Rabaya, naaresto ang mga suspek pasado alas 12:00 ng madaling araw noong Martes sa Brgy. Subangdaku, Mandaue City na kung saan nakumpiska mula rito ang nasa 310 gramo ng hinihinalang shabu na may Standard Drug Price na Php2,108,000.
Ayon pa kay Police Captain Rabaya, ang matagumpay na operasyon ay bunga ng maayos at mahusay na intelligence information at surveillance, maging ng tulong ng mamamayan.
Siniguro ng PS3, MCPO na kanila pang paiigtingin at pag-iibayuhin ang kampanya kontra ilegal na droga maging sa iba’t ibang uri ng kriminalidad para sa kaayusan, kapayapaan, at kaligtasan ng komunidad.
