Lanao del Sur – Nakumpiska ang Php3,400,000 halaga ng shabu habang naaresto naman ang dalawang suspek sa isinagawang PNP-PDEA buy-bust operation sa Brgy. Eastern, Wao, Lanao del Sur noong Nobyembre 29, 2022.
Kinilala ni Police Colonel Robert Daculan, Provincial Director, Lanao del Sur Police Provincial Office, ang naarestong suspek na sina alyas “Tenten”, 34, at alyas “Daud”, 41, na parehong residente ng Brgy. Buntongan, Wao, Lanao del Sur.
Naaresto ang dalawang suspek matapos magbenta ng shabu sa isang PDEA agent na nagpanggap bilang poseur buyer.
Ang matagumpay na operasyon ay magkatuwang na isinagawa ng mga tauhan ng PDEA BARMM, LDS PPO, Regional Special Enforcement Team, at Wao Municipal Police Station.
Nakumpiska mula sa mga suspek ang 500 gramo ng shabu na may tinatayang halaga na Php3,400,000, isang yunit ng mobile phone at isang yunit ng Bajaj Motorcycle na ginamit ng mga suspek.
Mahaharap ang mga suspek sa kasong paglabag sa R.A. 9165 o “Comprehensive Dangerous Drugs Act of 2002”.
Ang PNP katuwang ang iba’t ibang ahensya ng pamahalaan ay patuloy sa mandato na ipatupad ang sinumpaang pangako na hulihin at tugisin ang taong sangkot sa ganitong aktibidad para makamit ang kapayapaan tungo sa kaunlaran sa rehiyon ng Bangsamoro.
Panulat ni Patrolman Mark Vincent Valencia
