Cebu City – Timbog ang apat na drug suspek matapos makuhunan ng tinatayang nasa mahigit Php4.7 milyong halaga ng shabu sa PNP buy-bust operation nito lamang Huwebes, ika-24 ng Nobyembre 2022.
Kinilala ni Police Brigadier General Augustus Alba, Regional Director ng PRO 7, ang mga suspek na kinilalang sina alyas “Joselito”, 38; “Charles”, 28; “Maximo”; 33; at si “Danny”, 19.
Ayon kay PBGen Alba, naaresto ang mga suspek ng mga operatiba ng Regional Drug Enforcement Unit (RPDEU) 7 sa Sitio Eskwelahan, Barangay Buhisan, Cebu City.
Nakumpiska mula sa mga suspek ang nasa 700 gramo ng hinihinalang shabu na may Standard Drug Price na Php4,760,000 na agad naman na isinumite ng mga operatiba sa Regional Forensic Unit para sa pagsusuri.
Ang mga suspek ay nahaharap sa kasong paglabag sa Section 5 at 11, Art II ng RA 9165 o Comprehensive Dangerous Drugs Act of 2002.
Pinuri naman PBGen Alba ang RPDEU 7 para sa mahusay at epektibong pagganap ng kanilang tungkulin na nagresulta sa matagumpay na operasyon.
Tiniyak naman ng RPDEU 7 na kanila pang pagbubutihin at paiigtingin ang pagpapatupad ng kanilang mga hakbangin sa kampanya kontra ilegal na droga at maging sa iba’t ibang uri ng kriminalidad para sa mas mapayapa at ligtas na komunidad.
