Cagayan de Oro City – Arestado ang tatlong suspek matapos makuhanan ng tinatayang Php204,000 halaga ng shabu sa ikinasang joint buy-bust operation ng mga awtoridad sa Ecoverde Subdivision, Sitio Bato, Brgy. Indahag, Cagayan de Oro City nito lamang Martes, ika-22 ng Nobyembre 2022.
Kinilala ni Police Brigadier General Lawrence Coop, Regional Director ng Police Regional Office 10, ang mga naarestong suspek na sina alyas “Reyes”, 49, residente ng Ecoverde Subdivision, Sitio Bato, Brgy. Indahag, Cagayan de Oro City; alyas “John”, 23, residente ng Purok 4B, Gusa, Cagayan de Oro City at alyas “Marvin”, 35, residente ng Purok 2A, Gusa, Cagayan de Oro City.
Ayon kay PBGen Coop, naaresto ang mga suspek bandang 12:23 ng madaling araw ng mga operatiba ng Regional Drug Enforcement Unit 10 katuwang ang Cagayan de Oro City Police Station 2 – Drug Enforcement Unit at Philippine Drug Enforcement Group–Special Operation Unit 10.
Nakumpiska sa mga suspek ang siyam na pakete ng hinihinalang shabu na may timbang na 30 gramo na tinatayang nagkakahalaga ng Php204,000 at isang pirasong Php500 bill na ginamit bilang buy-bust money.
Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Tiniyak naman ng Police Regional Office 10 na patuloy ang kampanya kontra ilegal na droga at kriminalidad upang mas paigtingin ang kaayusan at kapayapaan sa kanilang nasasakupan.
Panulat ni Patrolman Joshua Fajardo/RPCADU 10
