Camp Crame, Quezon City – Nagningning ang buong kampo sa isinagawang Ceremonial Lighting of Christmas Tree and Lanterns nito lamang gabi ng Nobyembre 23, 2022 sa Camp BGen. Rafael T Crame, Quezon, City.
Ang aktibidad ay masayang pinangunahan ni Police General Rodolfo Azurin, Hepe ng Pambansang Pulisya kasama ang kanyang may bahay na si Mrs. Mary Grace L. Azurin, PNP Command Group at OLC Advisers.
Sa naturang seremonya ay naging tampok ang pagbubukas ng mga pailaw sa buong kampo, sinundan ng fireworks display na talaga namang nagbigay liwanag at bumuhay sa diwa ng ating kapaskuhan.
Nagbigay buhay rin sa naturang aktibidad ang performance ng Bailes De Luces mula sa Negros Occidental na nag-iwan ng ningnging sa mga mata ng mga nakapananood, nagpakitang gilas rin ang PNP Band, PNP Chorale, PNP Combo at PNP Fitness Team.
Ipinaabot naman ng naging tagapagsalita sa aktibidad, na si Hon. Alme Rhummyla G. Nicor-Mangilimutan, Mayor ng La Castellana, Negros Occidental at ang Hepe ng Pambansang Pulisya ang kanilang masayang pagbati at pasasalamat sa lahat ng nakibahagi at tumulong para sa matagumpay na pagsasakatuparan ng aktibidad.
Sinisiguro ng ating mga kapulisan na patuloy silang magsisilbi sa bayan lalong-lalo na sa nalalapit na yuletide season upang masiguro ang maligayang pasko at manigong bagong taon ng ating mga kababayan.
Photo Courtesy by: Police General Rhodel Orden Sermonia, TDCA
