Davao Oriental – Tinatayang Php150,000 halaga ng ilegal na coconut lumber ang nasabat ng mga tauhan ng Mati PNP sa kahabaan ng Barangay Matiao, Davao Oriental, noong Nobyembre 21, 2022.
Kinilala ni PLtCol Ernesto Gregore, Chief of Police ng Mati City Police Station, ang suspek na si alyas “Francis”, 37, residente ng Purok Mansanitas, Barangay San Antonio, Caraga, Davao Oriental.
Ayon kay PLtCol Gregore, nasabat ang mga ilegal na coconut lumber matapos dumaan ang isang wing van truck sa isinasagawang operasyon ng tauhan ng Regional Special Operation Group 11 at walang maipakitang kaukulang dokumento.
Dagdag pa ni PLtCol Gregore, tinatayang aabot sa 1,000 piraso ng coconut lumber ang nasabat na aabot sa halagang Php150,000.
Ang suspek ay nasa kustodiya na ng nasabing istasyon upang sampahan ng kasong paglabag sa Republic Act 8048 o Coconut Preservation Act of 1995 at upang dumaan sa tamang disposisyon.
Ang pagkakadakip sa suspek ay resulta ng magandang ugnayan at pagmamalasakit ng mamamayan at kapulisan sa komunidad na magdadala sa kaayusan at kaunlaran ng bansa.
Panulat ni Patrolman Alfred Vergara
