Sarangani Province – Isinagawa ang dalawang araw na pagsasanay ng mga Punong-Tanod na miyembro ng Barangay Peace Keeping Action Teams (BPATs) mula sa mga barangay ng Sarangani Province na ginanap sa Irish Garden Resort, Purok Liwliwa, Barangay Malalag, Maitum, Sarangani Province, noong Nobyembre 20, 2022.
Ayon kay Police Colonel Nicomedes Olaivar Jr, Provincial Director ng Sarangani Police Provincial Office, ang BPATs ay katulong ng kapulisan sa ilan nilang tungkulin tulad ng pagpapatupad ng kaayusan at katahimikan sa pamayanan, at pagsasagawa ng search, rescue and relief operations tuwing may sakuna o kalamidad.
Kaya naman, dapat ay patuloy silang nabibigyan ng kahalintulad na pagsasanay upang higit na maunawaan ang mga tungkuling iniatang sa kanila.
Upang matiyak na may natututunan ang mga sumailalim sa BPATs Training, nagbigay rin ng mga situationer activity ang PNP at BFP sa mga ito upang makita ang kanilang mga natutunan kung angkop ba ang mga aksyon na kanilang gagawin.
Nilinaw pa ni PCol Nicomedes na bukod sa kanilang mga tungkulin, dapat alam din ng BPATs ang kanilang mga limitasyon upang hindi malabag ang karapatan ng kanilang mamamayan.
Panulat ni Patrolman Khnerwin Jay A Medelin
