Caloocan City — Patay ang isang pulis at suspek matapos magpalitan ng putok sa nangyaring engkwentro sa Caloocan nito lamang Linggo, Nobyembre 13, 2022.
Kinilala ni NCRPO Acting Regional Director PBGen Jonnel Estomo, ang suspek na si Martin Luther Nuñez, 42, lalaki, dating kadete ng PMMA, at sakay ng isang puting Grandia.
Ayon kay PBGen Estomo, bandang 11:30 ng umaga ay iniulat na nagkaroon ng indiscriminate firing sa Blk. 31, Brgy. Pasok Putik, Quezon City kaya agarang rumisponde ang mga tauhan ng SWAT Team, DMFB, Sub-Station 16, SS8, at SS10 ng Quezon City Police District.
Ayon pa kay PBGen Estomo, tumakas ang suspek hanggang makapunta sa kanyang tirahan sa Blk 11 Lot 4, Palmera Homes, Nova East, Maligaya Parkland, Brgy 177, Caloocan City, kung saan pinaputukan niya ang mga operatiba na nauwi sa armadong engkwentro.
Sa kasamaang palad, nasugatan si PLtCol Jerry Castillo, Deputy Commander ng DMFB habang kill in action naman si PCpl Noel Ogano, miyembro ng SWAT.
Tumagal ng humigit-kumulang 30 minuto ang bakbakan sa pagitan ng mga operatiba at suspek.
Nagawa namang maghagis ng tear gas ng SWAT Team papunta kay Nuñez na syang naging dahilan upang sya ay maneutralize at matamaan ng bala na naging dahilan ng kanyang pagkamatay.
Pinapaabot naman si PBGen Estomo ang kanyang pakikiramay sa mga naulila ni PCpl Ogano, aniya, “Nakikidalamhati ang buong kapulisan ng NCRPO sa pagkawala ng isa sa aming kasamahan habang ginagampanan ang kanyang sinumpaang tungkulin. Nakikiramay din kami sa mga naulila nyang pamilya.
Dagdag pa niya, “Hindi matatawaran ang katapangan na ipinakita ni PCpl Ogano na walang takot na humarap sa panganib upang tuparin ang kanyang tungkulin. Ito ay tunay na kapuri-puri at dapat ipagmalaki.”
Source: PIO NCRPO
Panulat ni PSSg Remelin M Gargantos
