Carmen, Bohol – Binigyang katuparan ng mga tauhan ng Bohol Provincial Mobile Force Company (PMFC) ang paglulunsad ng “Project Sayon” sa Carmen, Bohol noong ika-12 ng Nobyembre 2022.
Ang “Project Sayon” ay isang pabahay program ng Bohol PMFC na binansagan bilang “Gugmang Halad sa Bol-anon, dili gyud ma Sayon-sayon-Pabahay Edition” na naglalayong mabigyan ng mas maayos at komportableng tahanan ang mga pamilya sa kanilang nasasakupan na nasiraan ng tirahan dahil sa mga nagdaang kalamidad na hanggang ngayon ay hindi pa naayos.
Sa pangunguna ni Police Lieutenant Colonel Homobuno R Sayon, Force Commander, katuwang ang mga tauhan nito at sa suporta na ipinaabot ng PMFC Advisory Council na si Mrs. Imelda C. Miner, Life Coach, at ng mga masugid na stakeholder ng naturang grupo ay nagawa nilang makapagpatayo ng isang bahay na handog sa napiling benepisyaryo ng programa.
Noong Sabado, pormal na iginawad at tinanggap ng pamilya ni Mr. and Mrs. Jessie Esto ng Brgy. Monte Swerte, Carmen, Bohol ang bahay na handog para sa mga ito.
Labis naman ang tuwa at pasasalamat ng pamilya Esto sa tulong at biyaya na kanilang natanggap mula sa kapulisan at maging sa mga taong tumulong para sa tagumpay na pagsasakatuparan ng programa.
Hangad ng PNP na maipadama ang tunay na serbisyong may malasakit sa bawat pamilya na isa sa mga pinakamahalagang bahagi ng lipunan na dapat mapangalagaan, maprotektahan, at magiging katuwang sa pagkamit ng isang maayos, ligtas, at maunlad na pamayanan.
