Davao City – Tinatayang Php258,400 halaga ng hinihinalang shabu ang nasabat sa isinagawang buy-bust operation ng PNP at PDEA sa Panacan Public Cemetery, Panacan, Davao City, noong Nobyembre 13, 2022.
Kinilala ni Police Major Jake Goles, Station Commander ng Sasa Police Station, ang suspek na si alyas “Bito”, 44, residente ng Purok 4, Poblacion Valencia City, Bukidnon na tinaguriang Top 2 High Value Individual sa City level.
Ayon kay PMaj Goles, naaresto ang suspek ng pinagsamang tauhan ng Sasa PS at Davao City Maritime Police Station kasama ang 1105th Maneuver Company, Regional Mobile Force Battalion 11 katuwang ang PDEA XI.
Dagdag pa ni PMaj Goles, nakuha mula sa suspek ang ilang pakete ng hinihinalang shabu na may bigat na humigit kumulang 16.15 gramo na may street market value na Php258,400 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Hindi naman titigil ang Police Regional Office 11 na magsagawa ng mga operasyon kontra ilegal na droga upang makamit ang kaayusan at kapayapaan sa tulong at suporta ng mga mamamayan sa lungsod.
Panulat ni Patrolman Alfred Vergara
