Sultan Kudarat – Mariing kinondena ng Police Regional Office (PRO) 12 ang pagsabog ng IED na nangyari sa loob ng isang Bus na nagresulta sa pagkamatay ng isang indibidwal at pagkasugat ng 11 na pasahero sa kahabaan ng Park Yellow Bell, Brgy. New Isabela, Tacurong City noong ika-6 ng Nobyembre 2022.
Ayon kay Police Lieutenant Colonel Joan Maganto, Hepe ng Tacurong City Police Station, bandang 11:00 ng umaga ng sumabog ang likurang bahagi ng isang Yellow Bus Line na may body number na 2588 na patungo sa pampublikong terminal ng Tacurong City.
Kaagad namang siniguro, kinordon, at prinoseso ng PNP ang pinangyarihan ng krimen.
Agad na dinala sa pinakamalapit na pagamutan ang mga sugatang biktima, ngunit isa rito ay nabawian ng buhay habang 11 ang kasalukuyang ginagamot.
Ipinaabot naman ni Police Brigadier General Jimili Macareg, Regional Director ng PRO 12 ang kanyang taos pusong pakikiramay sa naulilang pamilya ng namatay na biktima at kanya na ring inatasan ang buong hanay ng PRO 12 na magsagawa ng masusing imbestigasyon para mabigyang hustisya ang pagkamatay ng inosenteng biktima at sa 11 sugatan.
Dagdag pa, inatasan ng Regional Director ang lahat ng unit ng PNP na lalo pang paigtingin ang kanilang mga hakbang sa seguridad lalo na sa mga pangunahing lansangan at terminal.
Source: Tacurong City Police Station – PRO12
Panulat ni Patrolman Khnerwin Jay A Medelin
