Talisay, Camarines Norte – Arestado ng Talisay PNP ang Rank 5 Municipal Most Wanted Person na may kasong Acts of Lasciviousness sa Barangay Poblacion, Talisay, Camarines Norte nitong lamang Miyerkules ng umaga Nobyembre 2, 2022.
Kinilala ni Police Major Conrado De Vera Jr, Chief of Police, Talisay Municipal Police Station, ang akusado na si alyas “Pablo”, 31, binata, walang trabaho at residente ng Purok 5, Barangay San Jose, Talisay, Camarines Norte.
Ayon kay PMaj De Vera Jr, nagtungo umano ang akusado sa kanilang himpilan kasama ang kanyang ina upang magtanong tungkol sa kasong isinampa sa kanya, kung saan napag-alaman sa e-warrant system na mayroon nga itong kaso.
Ayon pa kay PMaj De Vera Jr, kaagad na inaresto ng kanyang mga tauhan si alyas “Pablo” sa bisa ng warrant of arrest para sa kasong Acts of Lasciviousness ng Article 336 ng Revised Penal Code in Relation to Section 5 (B) RA 7610 o Special Protection of Children Against Abuse, Exploitation and Discrimination Act at may rekomendadong piyansa na Php200,000 para sa kanyang pansamantalang kalayaan.
Dagdag pa ni PMaj De Vera Jr, napag-alaman nila sa report, na ang insidente ng kahalayan ay naganap noong Hunyo taong kasalukuyan sa Purok 5, Barangay San Jose, Talisay, Camarines Norte kung saan ang biktima ay isang menor de edad na babae.
Ang Pambansang Pulisya ay hindi titigil sa paghuli sa mga taong nagkasala sa batas upang mabigyan ng hustisya ang biktima at para masugpo ang kriminalidad sa ating bayan.
Source: Camarines Norte PPO
Panulat ni Pat Jomar Danao
