Estancia, Iloilo – Arestado ang Top 1 Most Wanted Person ng Western Visayas sa isinagawang manhunt operation ng pulisya sa Feeder Port Area, Poblacion Zone 2, Estancia, Iloilo nito lamang ika-1 ng Nobyembre 2022.
Kinilala ni Police Lieutenant Arniel Buraga, Officer-In-Charge ng Estancia Municipal Police Station, ang suspek na si Ivan Antonio Posto alyas “Intoy”, 18, residente ng Brgy. Baybay, Balud, Masbate na kasalukuyang nakatira sa Brgy. San Roque, Estancia, Iloilo.
Ayon kay PLt Buraga, naaresto ang suspek sa bisa ng Warrant of Arrest sa dalawang kaso ng Murder at Frustrated Murder na may kaukulang piyansa na Php200,000.
Ayon pa kay PLt Buraga, si Intoy ay nasangkot din sa pagpatay noong Agosto 2021 kasama ang kanyang mga gangmates o mas kilala sa tawag na “Batang Traplin” o “Batang Pantalan”.
Naging matagumpay ang operasyon sa pagtutulungan ng mga operatiba ng Estancia MPS, katuwang ang Regional Intelligence Division, PRO6 sa pangunguna ni Police Colonel Reynante Panay, Maritime Police Station, CIDG Iloilo PFU, Highway Patrol Group Iloilo PFU, PIT Ilolo, PIU at PIDMU IPPO sa ilalim ng pangangasiwa ni Police Colonel Noel C Aliño, Officer-In-Charge, Iloilo Police Provincial Office.
Patuloy naman ang PNP sa pagtugis sa mga taong may pananagutan sa batas upang mabigyang hustisya ang kanilang mga biktima, gayundin sa pagpapanatili ng kaayusan at kapayapaan tungo sa kaunlaran ng ating bansa.
