Tuluyang nahulog sa kamay ng mga otoridad ng Cebu City Police Office ang tinaguriang Top 3 Provincial Most Wanted Person ng Cebu sa kasong ilegal na droga sa operasyon na inilunsad noong Linggo, Oktubre 31, 2022 sa Brgy. Mabolo, Cebu City.
Kinilala ni Police Colonel Ireneo Dalogdog, City Director ng Cebu City Police Office, ang naaresto na si Arturo Namanas, 64, residente ng Talangnan, Madredijos, Cebu.
Ayon kay Police Colonel Dalogdog, si Namanas ay inaresto bandang 10:30 ng gabi noong Linggo ng mga tauhan ng Police Station 4, CCPO sa bisa ng Warrant of Arrest sa kasong paglabag sa Section 5 ng Article II ng RA 9165 o Comprehensive Dangerous Drugs Act of 2002.
Ang matagumpay na pagkakaaresto ng akusado ay bahagi at bunga ng maayos at epektibong pagpapatupad ng Cebu City Police Office ng One-Time Big-Time Police Operations sa lungsod.
Ang One-Time Big-Time Police Operation ay isang all-out police operation na maigting at sabay-sabay na isinasagawa laban sa mga naitalang wanted persons at drug personalities sa isang lugar.
Hangad nito na tuluyang madakip at mapanagot ang bawat personalidad na may mga pananagutan sa batas, mabigyan ng hustisya ang mga naging biktima sa mga naganap na krimen, at magkaroon ng isang ligtas at mapayapa na komunidad.
