Batangas – Arestado ang isa sa mga kabilang sa talaan ng DILG Most Wanted Person sa kasong Murder sa ikinasang operasyon ng pulisya sa Barangay 2 (Poblacion), Laurel, Batangas nito lamang Martes, ika-1 ng Nobyembre 2022.
Kinilala ni Police Lieutenant Colonel Victor Rito, Acting Chief ng Internal Security Operation Division (ISOD) ng Intelligence Group, ang naaresto na si Rudy Lim alyas “Rudy”, residente sa nabanggit na lugar.
Ayon kay PLtCol Rito, si Lim ay ang pangunahing suspek sa pagpatay kay Ludigario Hernandez Ilagan noong Setyembre 30, 1996 sa Mindoro.
Ayon pa kay PLtCol Rito, sa ilalim ng DILG Resolution Number MC 2006-146, si Lim ay napabilang sa listahan ng DILG Most Wanted Person noong Oktubre 4, 2022 at may naitalang pabuya na nagkakahalaga ng Php140,000.
Dagdag pa ni PLtCol Rito, naaresto si Lim bandang alas-4 ng hapon ng Martes matapos maihain ng mga operatiba ng ISOD ng Intelligence Group na pinangunahan ni PLt Vincent Cadiao ang Warrant of Arrest katuwang ang RIU4A, RIU4B, RID 4A, PIU Batangas, RSOU4A, NICA-NCR, Intelligence Section ng San Juan City Police Station, Laurel MPS at Pinamalayan MPS, PRO4B.
Ang matagumpay na pagkakaaresto sa akusado ay patunay nang walang humpay na pagpapatupad ng PNP ng kanilang mandato upang mapanagot ang nasa likod ng mga nangyaring krimen at nang maibigay ang kaukulang hustisya sa mga biktima.
