Parañaque City — Isang lalaking Chinese National ang nasagip matapos dakpin ng apat na kalalakihan sa Parañaque City nito lamang Lunes, Oktubre 31, 2022.
Kinilala ni PBGen Kirby John Kraft, Southern Police District Director ang mga suspek na sina Qiang Wang, Chinese National, 34; Norvin Yusuff y Afalla, 42, personal assistant/driver; Joseph Barbas y Arrado, 45; at Niño Felisan y Noterte, 30, driver.
Ayon kay PBGen Kraft, bandang 9:10 ng gabi ay naaresto ang mga suspek sa kahabaan ng Bradco corner Macapagal Boulevard sa tabi ng ASEANA power station Barangay Tambo, Parañaque City.
Ayon sa ulat, personal na pumunta ang kapatid ng biktima na si Ms. Wang Ting sa Tambo Police Station upang i-report na ang kanyang nakababatang kapatid ay isinakay ng apat na lalaki sa isang van metallic grey na Toyota Hi-Ace na may Plate Number na IAD 774 kung kaya agarang nagsagawa ng operasyon ang mga tauhan ng Sub-Station 2 ng naturang istasyon na nagresulta sa matagumpay na pagkakaaresto sa mga suspek.
Narekober mula sa mga suspek ang isang kalibre 9mm pistol na kargado ng walong live ammunition at isang kulay grey Toyota Hi-ace Commuter Van.
Dinala ang apat na suspek sa Tambo Sub-Station 2 para sa tamang pagproseso at dokumentasyon ng kaso.
Pinuri naman ni PBGen Kraft ang agarang aksyon ng Parañaque Police sa kanilang mabilis na pagkakaaresto sa mga suspek at tiniyak rin nya na patuloy na makakaasa ang mga taga-Southern Metro sa kanilang ligtas at tahimik na lugar.
Source: SPD
Panulat ni PSSg Remelin M Gargantos
