Sarangani Province – Narekober ng kapulisan ang Php243,000 na halaga ng imported na sigarilyo mula sa isang abandonadong bangka sa bahagi ng Balut Island, Sarangani Province noong Oktubre 30, 2022.
Ayon kay PMsg Roger Agodania ng Maritime Police Precinct, nakatanggap ng tawag ang kanilang tanggapan mula sa isang concerned citizen na mayroong inabandonang bangka sa naturang lugar.
Agad na nagtungo ang kapulisan ng Balut-Island MPS, Sarangani Municipal Police Station at Task Force Seahawk Patuco upang beripikahin ang nasabing ulat.
Pagdating ng grupo sa nasabing lugar dito tumambad ang isang abandonadong bangka na may lamang ilang kahon ng Ghudang Baru cigarettes na may tinatayang halaga na Php243,000 na nagmula pa sa bansang Indonesia.
Agad naman dinala ang bangka kabilang ang mga narekober na sigarilyo sa tanggapan ng Balut-Island MPS para sa dokumentasyon at tamang disposisyon.
Paalala naman ng ating kapulisan na wag mag-atubiling tumawag sa ating kapulisan kapag may mga ganitong uri ng insidente. Dagdag pa dito, ang mga ganitong uri ng smuggled na sigarilyo ay wag tangkilikin dahil ito ay hindi dumaan sa tamang proseso at hindi nakasisiguro ang ating mga kababayan sa nilalaman ng mga ito.
Panulat ni Patrolman Gio Batungbacal
