Nasagip ng Nueva Vizcaya PNP ang dalawang indibidwal at narekober ang isang bangkay sa isinagawang rescue operation sa Barangay Cutar, Aritao, Nueva Vizcaya nito lamang Oktubre 30, 2022.
Pinangunahan ni Police Colonel Dante Lubos, Officer-In-Charge ng Nueva Vizcaya Police Provincial Office ang Search, Rescue at Retrieval Operation na isinagawa sa nabanggit na lugar.
Ayon sa report, ang narekober na bangkay ay nakilalang labi ni Juanito Valera, 75, market vendor at residente ng Brgy. Kirang, Aritao, Nueva Vizcaya. Siya ay tumatawid sa isang tulay pupuntang trabaho nang siya ay matangay ng malakas na agos na sanhi ng Bagyong Paeng.
Samantala, ang dalawang (2) nasagip ay kinilalang sina Laila Ramirez, 27, at Alfredo Julian, 62, parehong residente ng Purok 4, Balite, Aritao, Nueva Vizcaya na una nang naiulat na nawawala dahil sa pagkalunod.
Kinilala ang nawawala na si Nico Ramirez, 26, residente rin ng Brgy. Balite. Kasama niya ang kanyang asawang si Laila at biyenan na tumatawid sa isang overflowing bridge nang biglang tinangay ng rumaragasang tubig ng ilog.
Pansamantalang sinuspinde ang rescue operation dahil sa electrocution incident na kinasangkutan ni Pat John Marvin Estocado. Sa ngayon ay nasa stable condition na si Pat Estocado.
Magpapatuloy ang operasyon katuwang ang Nueva Vizcaya PPO Search, Rescue and Retrieval Personnel, 2nd Nueva Vizcaya Provincial Mobile Force Company; Aritao Police Station, Dupax del Sur PS, Bambang PS at Bayombong PS, Provincial Disaster Risk Reduction Management Office, MDRRMO Aritao, 86 Infantry Battalion, 5ID PA, Philippine Red Cross, Kabalikat Rescuers, LGU rescuers at iba pang civilian volunteers.
Source: Nueva Vizcaya PPO
Panulat ni Police Corporal Carla Mae P Canapi
