Pototan, Iloilo – Timbog ang isang estudyante at nasamsam ang mahigit Php1 milyong halaga ng shabu sa buy-bust operation ng pulisya sa Brgy. Rumbang, Pototan, Iloilo nito lamang ika-25 ng Oktubre, 2022.
Kinilala ni Police Major Roy Tayona, Hepe ng Pototan Municipal Police Station, ang subject person na si Lance Peñafiel Florida, 21, isang High Value Individual, at residente ng Rizal St., Pototan, Iloilo.
Ayon kay PMaj Tayona, nahuli ang suspek matapos itong magbenta ng Php100,000 na halaga ng pinaniniwalaang shabu sa isang police poseur buyer.
Ayon pa kay PMaj Tayona, narekober din kay Florida ang tatlong piraso ng heat-sealed plastic sachet ng hinihinalang shabu at ang ginamit na drug buy-bust item na may kabuuang timbang na 105 grams na may Standard Drug Prize na Php1,020,000.
Dagdag pa nito, napag-alaman din na si Florida ay isang mag-aaral ng Alternative Learning System.
Ang operasyon ay naging matagumpay sa pagtutulungan ng mga operatiba ng Philippine Drug Enforcement Unit-IPPO sa pangunguna ni Police Captain Francis Albert Fortunado, Chief PDEU-IPPO, Police Intelligence Unit ng Pototan MPS at 2nd Iloilo Provincial Mobile Force Company.
Ang suspek ay nahaharap sa paglabag sa RA 9165 o ang Comprehensive Dangerous Drugs Act of 2002.
Patuloy ang Pambansang Pulisya sa pagpapaigting sa kampanya laban sa ilegal na droga at iba pang uri ng kriminalidad upang mapanatili ang Kaayusan, Kapayapaan tungo sa Kaunlaran ng ating bansa.
