Baras, Catanduanes – Tulung-tulong na binuhat ng mga kapulisan ng Catanduanes 1st Provincial Mobile Force Company ang 75 taong gulang na senior citizen na babaeng na-stroke sa Purok 5, Benticayan, Baras, Catanduanes nitong Martes, Oktubre 25, 2022.
Ang pagtulong sa senior citizen ay pinangunahan ni Police Lieutenant Catlo A Lita sa ilalim ng pamumuno ni Police Major Dante B Bonafe, Officer-In-Charge.
Iniulat ni Ginoong Vicente V Timuat sa kampo ng Catanduanes 1st PMFC ang tungkol sa kanyang asawa na di maigalaw ang kanyang katawan. Kung kaya, hindi na nagdalawang-isip ang mga kapulisan at isinakay siya sa duyan at pinagtulungang buhatin kung saan dumaan sila sa ilog at palayan maidala lamang ang pasyente sa ospital at mabigyan ng tamang lunas at gamot.
Ang ganitong klase ng pagtulong ay naaayon sa programa ng Hepe ng Pambansang Pulisya na MKK=K o Malasakit, Kaayusan, Kapayapaan tungo sa Kaunlaran na naglalayong tulungan ang ating mga kababayan na higit na nangangailangan.
Source: Catanduanes 1st PMFC
