Cebu City – Aktibong nakilahok ang mga miyembro ng Police Regional Office (PRO) 7 sa isinagawang Rotary Bloodletting Activity nito lamang Linggo, Oktubre 23, 2022 sa Robinson’s Galleria, North Reclamation Road, Cebu City.
Ang aktibidad ay personal na dinaluhan ni Police Brigadier General Roderick Augustus Alba, Regional Director ng PRO 7 kasama si Police Colonel Antonietto Cañete, Chief ng Regional Community Affairs and Development Division (RCADD), at Police Lieutenant Colonel Aurora Rayos, Chief ng Public Information Office (PIO) at ilan pang mga miyembro nito.
Kabilang pa sa mga dumalo sa makabuluhang aktibidad ay ang Presidente ng Rotary Club ng Cebu, Mr. Pouly Jong, Dr. Ester Concha ng Red Cross, at mga volunteers mula sa iba’t ibang sektor ng lipunan kabilang na ang mga miyembro ng Philippine Navy, Tau Gamma Fraternity at UC ROTC.
Mula sa daan-daang mga blood donors na nakiisa sa aktibidad, tinatayang nasa 130 na miyembro mula sa hanay ng PNP ang lumahok sa programa.
Maliban sa hangaring makatulong na mapunan ang kakulungan ng supply ng dugo sa ilang mga pampublikong pagamutan, pangunahing layunin ng nasabing aktibidad na maipadama ang pagmamalasakit sa mga pasyenteng nangangailangan ng agarang pagsasalin ng dugo na bahagi ng kanilang gamutan para sa pagkakaroon ng maginhawang pakiramdam at maayos na kalusugan.
Samantala, sa naging mensahe ni Police Brigadier General Alba sa programa, kanyang pinuri ang grupo sa likod ng naturang aktibidad ang “Rotary Club” para sa kanilang mga makabuluhang programa at sa walang humpay na paghahatid ng mga serbisyong tapat at punong-puno ng malasakit.
Kasabay nito, kanya ring pinasalamatan ang lahat ng grupo at ahensya ng pamahalaan para sa kanilang pakikiisa upang mabigyang katuparan ang aktibidad.
