Tulong-tulong na inayos at pinaganda ng mga tauhan ng 605th Maneuver Company (MC), RMFB6 sa pamumuno ni Police Captain Jerome Manahan, kasama ang mga kawani ng 79th Infantry Battalion (IB) ang Huebesan Day Care Center sa Sitio Huebesan, Brgy. Marcelo, Calatrava, Negros Occidental nito lamang ika-19 ng Oktubre 2022.
Matatandaan na nagsagawa ang mga kapulisan at sundalo ng Feeding Program sa naturang Day Care Center at napansin nila ang sitwasyon nito na nagtulak sa kanila na bigyan ito ng pansin upang ito ay maayos at mabigyan ng bagong mukha at buhay.
Ang pagsasaayos ng naturang center ay bahagi ng programang Modified Community Support Program na patuloy na isinasagawa sa nabanggit na lugar na naglalayong magbigay ng agarang tulong at aksyon sa mga nangangailangan.
Labis naman ang pasasalamat ng guro ng nasabing day care center na si Mrs. Rodjilyn Sombrador maging ang mga magulang ng mag-aaral ay lubos din ang tuwa at pagpapasalamat sa inisyatibong hatid ng ating kapulisan at mga sundalo.
Sa pagkakaroon ng mas maayos na silid-aralan ay mas lalong pagpupursigi na may kasamang galak at kasiyahan ang mga kabataang mag-aaral na isang paraan sa pag-abot ng kanilang pangarap.
Life is beautiful, tulong-tulong tayo! Ang PNP katuwang ang ibang ahensya ng gobyerno ay patuloy na nagbibigay ng magandang serbisyo at malasakit sa kapwa upang mapanatili ang Kaayusan, Kapayapaan tungo sa Kaunlaran.
