Davao del Norte – Tinatayang Php342,000 halaga ng hinihinalang shabu ang nasabat sa isinagawang buy-bust operation ng PNP sa Purok San Antonio, Barangay Cuambogan, Tagum City, Davao del Norte, noong Oktubre 19, 2022.
Kinilala ni PLtCol Jay Dema-Ala, Acting Chief of Police ng Tagum City Police Station, ang target sa operasyon na si alyas “Sherwin”, 38, residente ng Sasa Bay view, Davao City na tinaguriang High Value Individual, kasama din sa mga naaresto ang apat na kalalakihan kabilang ang isang menor de edad na nahuli sa akto na nagsasagawa ng pot session.
Ayon kay PLtCol Dema-Ala, naaresto ang mga suspek sa isinagawang buy-bust operation ng pinagsamang tauhan ng Tagum CPS at Regional Police Drug Enforcement Unit 11 kasama ang Regional Special Operation Group 11.
Dagdag pa ni PLtCol Dema-Ala, nakuha mula sa mga suspek ang ilang pakete ng hinihinalang shabu na may bigat na humigit kumulang 50.3 gramo na may street market value na Php342,000 at isang caliber .45 at magazine na may kasamang limang bala.
Ang mga suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms and Ammunition Regulation Act.
Ang pagkakadakip sa suspek ay maglalapit sa layunin ng Police Regional Office 11 na gawing drug-free ang rehiyon onse at sa malasakit na ipinapakita ng kapulisan sa mga mamamayan ay makakamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
