Lebak, Sultan Kudarat – Nabulilyaso ang pagbebenta ng dalawang lalaki sa nakaw na kabayo at baka sa Sitio Pigil, Brgy. Bolebak, Lebak, Sultan Kudarat ng wala itong maipakitang dokumento sa kanilang pagbebentahan noong Oktubre 17, 2022.
Kinilala ni Police Lieutenant Julius R Malcontento, Hepe ng Lebak Municipal Police Station, ang dalawang suspek na sina alyas “Jun-jun”, 18, single, walang trabaho at si alyas “Jeric”, 22, may-asawa, at pawang residente ng Brgy. Renti, Nuro Upi, Maguindanao del Norte.
Ayon kay PCol Malcontento, agad naman na nakipag-ugnayan ang kanilang tanggapan sa mga karatig na munisipalidad at sa probinsiya ng Maguindanao sa posibleng reklamo ng mga nawawalan ng alagang hayop.
Bilang tugon, dumating sa Lebak MPS ang dalawang nagrereklamo mula South Upi, Maguindanao del Norte na nawawalan ng baka at mula naman sa North Upi, Maguindanao del Norte na nawawalan ng alagang kabayo. At batay sa natanggap na paglalarawan ay tugma sa narekober na dalawang hayop sa mga suspek.
Agad namang inaresto ang dalawang lalaki matapos mapatunayang nakaw ang mga ibinebentang hayop ng mga ito.
Dahil sa patuloy na pagtutulungan ng ating kapulisan at pamayanan mas lalong nalalabanan at napipigilan ang mga taong gumawa ng krimen sa komunidad.
Kaya’t tinitiyak ng kapulisan ng Police Regional Office 12 sa ilalim ng pamumuno ni Regional Director, PBGen Jimili Macaraeg na mas lalo pa nitong papalakasin ang kampanya sa lahat ng uri ng kriminalidad tungo sa katahimikan ng rehiyon.
Source: Lebak Municipal Police Station – PRO 12
Panulat ni Patrolman Khnerwin Jay A Medelin
