Calamba City, Laguna – Tinatayang Php340,000 halaga ng shabu ang nasabat sa dalawang Street Level Individual (SLI) at isa ang patay habang isang pulis sugatan sa naganap na engkwentro sa ikinasang buy-bust operation ng San Pedro City PNP sa Sitio Rustan, Bgy. Langgam, San Pedro City, Laguna nito lamang Linggo, Oktubre 16, 2022.
Kinilala ni Police Lieutenant Colonel Victor Ben Isidore Aclan, Acting Chief of Police ng San Pedro City Police Station, ang dalawang naaresto na sina Mark Rigor Calo-Oy Y Miravalles alyas “Kapre”, 32, may asawa, walang trabaho, residente ng B16 L23 Southville 3A Extension, Brgy. San Antonio, San Pedro City, Laguna at Roxy Solidad Y Manzano, 32, walang asawa, walang trabaho, residente ng #4 Gumamela Street, Brgy. Langgam, San Pedro City, Laguna.
Habang kinilala ang namatay sa engkwentro na si Rommel Sagun alyas “Ulo” residente ng Sitio Rustan, Brgy. Langgam, San Pedro City, Laguna.
Ayon kay PLtCol Aclan, bandang 12:50 ng madaling araw naaresto ang dalawang suspek sa nabanggit na barangay ng Intel Operatives/ Drug Enforcement Unit personnel ng San Pedro City Police Station.
Narekober sa mga suspek ang 22 pirasong heat-sealed transparent plastic sachets ng hinihinalang shabu na may timbang na 50 gramo na nagkakahalaga ng Php340,000, isang coin purse, Php300 bilang buy-bust money, Php1,500 bilang recovered money, isang Caliber 9mm pistol na burado ang marka at serial number, magazine na may dalawang bala ng 9mm, isang itim na coin purse na may lamang pitong bala ng baril, isang brown coin purse, isang kulay dalandan at maliit na plastic box.
Samantala, isinugod sa ospital si Patrolman James Moreno na nagtamo ng sugat sa kanang kamay.
Nahaharap ang dalawang suspek sa kasong paglabag sa Section 5 at 11, Article 2 ng Republic Act 9165 o Comprehensive Dangerous Drugs Act of 2002.
